---

13.12.2023

Фонды стипенди – ХИПУ-йы студенттæн

Хуссар Ирыстоны паддзахадон университеты студенттæн йæ фыццаг стипендитæ радта «Коммуникациты рæзты дунеон иститут «МИР-МОСТ-ОСЕТИЯ»-йы фонд.

Фæндзгай мин сомы стипендитæ цытджын уавæры райстой ХИПУ-йы дæс студенты. Уæлдæр ахуыргæнæндоны ректор Тедеты Вадим бузныджы ныхæстæ загъта фондæн æмæ банысан кодта, стипендитæ студентты кæй разæнгард кæндзысты хуыздæр ахуыр кæнынмæ, афтæ ма æхсæнадон æмæ зонадон куысты активондæр хайад исынмæ.

«Мæнæн стыр æхсызгон у, фонд «МИР-МОСТ-ОСЕТИЯ» Хуссар Ирыстоны университетимæ æмгуысткæнынады тыххæй сразыдзинадыл йæ къух кæй æрфыста æмæ иумæйаг архайды фыццаг къахдзæфтæ кæй аразæм», – загъта ректор.

Хуссар Ирыстоны Уæрæсейы Федерацийы минæварады уынаффæгæнæг Михаил Ершов бузныг загъта республикæйы разамынадæн, Тедеты Вадимæн иумæйаг куысты тыххæй.

«Мах райгонд стæм, ахсджиаг æхсæнадон-политикон мадзæлтты хайад райсыны фадат нын кæй ис æмæ иу хъуыддаг кæй аразæм. Фонды ном дæр дзурæг у, иугæнæг кæй у æмæ нæ иу та бирæ цыдæртæ кæй кæнынц, уæлдайдæр та ныры уавæрты», – банысан кодта уый.

Бузныджы ныхæстæ загъта Хуссар Ирыстоны «Россотрудничество»-йы минæварады сæргълæууæг Сергей Комиссаров дæр æмæ се стипендиты тыххæй раарфæ кодта студенттæн.

Фонд «МИР-МОСТ-ОСЕТИЯ»-йы хъусдарæг советы уæнг Андрей Сергеев банысан кодта, мадзалы дзырд кæй цæуы, иумæ куыд кусын хъæуы, уыдæттыл. Раппæлыд студентты æнтыстытæй дæр.

«Ахуыр уын кæд бирæ хъарутæ исы, уæддæр уымæ нæ кæсгæйæ, сымах ссарут рæстæг, цæмæй уат æхсæнадон хъуыддæгты активон æмæ мæ ныфс ис, уæ активон æмбæстагон позици дарддæр кæй рæздзæн æмæ уæ къухты стыр æнтыстытæ кæй æфтдзæн», – загъта сын уый.

Коммуникациты рæзты дунеон институты хъусдарæн советы сæрдар   Бекъойты Сослан зæрдыл æрлæууын кодта, зæгъгæ, номыл стипендитæ фидар æрцыдысты Фонд æмæ университеты ‘хсæн  сразыдзинады фæлгæтты æмæ студенттæн йæ цæст бауарзта, цæмæй ног æнтыстытæ сæ къухты æфта.

РХИ-йы фонды директор Тадтаты Таймураз банысан кодта, Уæрæсе æмæ Хуссар Ирыстоны ‘хсæн дарддæр дæр кæй цæуынц интеграцион процесстæ æмæ ацы мадзал дæр уымæн æвдисæн кæй у.

Студенттæ сæ рады бузныг загътой, ахæм стипендитæ сын кæй радтой, уый тыххæй.

https://xurzarin.ru/fondy-stipendi-xipu-jy-studenttaen/

Короткая ссылка на новость: http://xipu.ru/~MPvzs

Возврат к списку