---

24.10.2023

Бюст университеты бындурæвæрæгæн

24-æм октябры Хуссар Ирыстоны паддзахадон университеты бæстыхайы цытджын æгъдауæй байгом кодтой Тыбылты Алыксандры бюст.

Ардæм æрбацыдысты цытджын уазджытæ, нæ республикæйы къухдариуæгад Президент Гаглойты Аланы сæргълæудæй.

Хъæздыг истори ис нæ республикæйы  уæлдæр ахуыргæнæндонæн. 1922 азы уæды АКП ЦК барамындæй гом æрцыд Сталиниры педагогон техникум. Фæстæдæр, техникум ссис паддзахадон педагогон институт. 1993 азы та хуссарирыстойнаг институты бындурыл сырæзт нæ абоны университет. Зынгæ ирон ахуыргонд, æхсæнадон архайæг æмæ университеты бындурæвæрджытæй иу уыд Тыбылты Алыксандр. Цалынмæ 2008 азы августы ХИПУ-йы бæстыхай нæ басыгъд, уæдмæ йæ номарæн цырт уыд дыккаг уæладзыгмæ схизæны асины цур. Ног университетон комплекс куы сырæзт, уæд ректор Тедеты Вадим зонадон-практикон конференцийы рæстæджы Тыбылты Алыксандры 130 азы юбилейы цытæн уагъд ног бæстыхайы раз Къоста æмæ Тыбылты Александрæн бюстытæ сæвæрыны фæндон бахаста. Къостайы бюст ахуыры азы райдианы байгом кодтой. Дыууæ бюсты дæр сарæзта Уæрæсейы сгуыхт нывгæнæг Дзукъаты Никъала.

Бюст университеты бындурæвæрæгæн
«ХИПУ-ы студенттæм бацæуын»-ы бæрæгбон

Фæстаг азты университеты традицион ссис «Посвящение в студенты ЮОГУ»-йы бæрæгбон нысан кæнын.

25 октябры актон залы бæрæгбонмæ фæуазæг сты хицауад æмæ парламенты минæвæрттæ, фыццагкъурсонты ныййарджытæ, æхсæнады минæвæрттæ.

Ацы аз университетмæ ахуыр кæнынмæ æрбацыд 837 студенты. Уыдоныл цины æнкъарæнтимæ сæмбæлдысты ахуыргæнджытæ – уыдон сын фондз азы дæргъы сæ равзаргæ професситы сусæгдзинæдтæ амондзысты.

Бæрæгбон райдыдта, хистæркъурсонтæ сæ кæстæртæн цы номыртæ бацæттæ кодтой, уыдонæй. Зæрдиаг арфæтæ æмæ зондамонæн ныхæстæ кодтой уыдон фыццагкъурсонтæн. Дзырдтой сын, æмбæлон зонындзинæдтæ райсынæй дарддæр ма кæй хъæуы ирон культурæ, традицитæ æмæ æгъдæуттыл кусын дæр. Университеты цы сфæлдыстадон къордтæ ис, уыдоны архайджытæ уазджытæн æвдыстой сæ арæхстдзинад.

Уый фæстæ фыццагкъурсонтæ цытджын æгъдауæй ард бахордтой, æнувыд кæй уыдзысты ахуырыл.

Сценæмæ схызт ХИПУ-ы ректор Тедеты Вадим æмæ зæрдиаг арфæ ракодта фыццагкъурсонтæн: «Мах, æппынæдзух, архайæм, нæ университеты ахуыр-хъомыладон процесс хуыздæр кæныныл. Нæ университетæн бастдзинæдтæ ис Уæрæсейы хуыздæр уæлдæр ахуыргæнæндæттимæ. Нæ ахуыргæнджытæн фадат ис сæ квалификаци фæбæрзонддæр кæнынæн. Афтæ ма нæ рауагъдон студенттæ дæр арæх ацæуынц æмæ хайад райсынц УФ-йы форумты зонадон конференциты. Иу ныхасæй, не ‘нтыстытæ дарддæр баст уыдзысты сымахимæ, нæ зынаргъ фыццагкъурсонтæ», – дзырдта ректор. Уый фæстæ цытджынæй радта студенты бæлвырдгæнæнтæ, Кæсæг-Балхъары республикæйæ нæм чи æрцыд уыцы фыццагкъурсонтæн,

Арфæйы ныхæстæ ракодта фыццагкъурсонтæн Президент Гаглойты Алан дæр: «Зынаргъ студенттæ! Цыдæриддæр хорзæй аразæм, уыдон иууылдæр сымахæн сты. Уымæн æмæ сымах стут нæ фидæнаразджытæ æмæ уæ стæм сæрыстыр. Уæ сæйраг хæс у хорз ахуыр кæнын æмæ зонындзинæдтæ исын, кæддæриддæр уымæ зæрдиагæй тырнут. Нæ республикæйы æппæт къабазты дæр хъæуы дæсны специалисттæ. Университет куы сырæзт, уæдæй нырмæ рауагъта бирæ кадртæ. Ам ахуыр кодтон æз дæр. Ам ис хорз профессортæ, зонады кандидаттæ,  сæ зонындзинæдтæ нæ хæлæг кæнынц сымахæн æмæ сæ исут нæртонæй».

«Абоны мадзал уыд тынг цымыдисон. Ректоры фæлмæн ахаст студенттæм, йæ мидисджын раныхас мын мæ зæрдæйы ныууагъта хорз тæлмæнтæ. Дыууæ мæйы ахуыр кæнын университеты. Журналисты професси кæй равзæрстон, уый раст кæй уыдис, уый абон хуыздæр банкъардтон, университеты сценæйыл 3-аг курсы студенттæ Гайты Анна æмæ Гæззаты Олегы амонджытæй куы федтон, уæд. Мах, фыццагкъурсонтæ, кæрæдзийы фарстам «цыма мах дæр искуы афтæ сарæхсдзыстæм», зæгъгæ. Зонын, университетæн ис йæхи традицитæ, уыдоныл схъомыл сты бирæ ахуыргонд фæлтæртæ. Нæ хистæртæ стыр хайбавæрд бахастой нæ паддзахады рæзтмæ. Æмæ абон уыдоны раст архайд æмæ зондджын къахдзæфты руаджы стæм хæдбар паддзахад. Хистæркъурсонтæ нын цы концертон программæ равдыстой, студентты сфæлдыстадон къордтæ цы зарджытæ азарыдысты, уыдон иууылдæр мæ зæрдæмæ тынг фæцыдысты. Фæнды мæ, уыдонмæ баиу уæвын, цæмæй фидæнмæ фыццагкъурсонтæ цы мадзал цæттæ кæной, уым æз дæр хайад райсон», – дзырдта Тъехты Виктория.

Университеты коллектив кæддæриддæр бацархайы, цæмæй студент суа æмбæлон дæсны йæ равзаргæ профессийы.

Фидæны цардаразджытæ куы тырной зонындзинады бæрзæндтæм, уæд сæ къухы бафтдзæнис æнтыстытæ.

Фæнды мæ, цæмæй сæ не ‘ппæт дæр сæрыстыр уæм. Рæствæндаг ут, хъæбултæ!

https://xurzarin.ru/byust-universitety-bynduraevaeraegaen/

Короткая ссылка на новость: http://xipu.ru/~bMtY5

Возврат к списку