---

23.10.2023

Уырыссаг фыссæг йæхи хуыдта ирон лæг

Хъысмæт æмæ историйы зилдухæнты уырыссаг литературæйы классик, стыр фыссæг Гæздæнты Гайтойы царды фæндæгтæ афтæ ацыдысты æмæ Уæрæсемæ йæ ном æрмæстдæр 1989 азы æрыздæхт. Не стыр паддзахады, ома, Уæрæсейы æмæ йæ фыдæл-ты уæзæг Ирыстоны Гайто ныртæккæ  у зындгонд. Йæ уацмыстæ йын кæсынц, иртасынц, æндæр æвзæгтæм сæ тæлмац кæнынц.

Ацы аз Гæздæнты Гайтойыл 120 азы 3 декабры кæй æххæст кæны, уый цытæн Уæрæсе, Цæгат Кавказ æмæ Ирыстоны дыууæ хайы дæр цæуынц алыгъуызон литературон æмæ мысæн изæртæ, тымбыл фынгтæ æмæ равдыстытæ. Не ‘мзæххон курдиатджын фыссæг арф фæд æмæ стыр хуынтæ кæй бахаста аивадон литературæмæ, уымæ гæсгæ йын абон стыр аргъ кæнынц литературæиртасджытæ.

22-æм октябрæй йæ куыст райдыдта æхсæнадæмон фестиваль «Осетия-Россия: общее культурное наследие». Юбиляры цытæн ацы фестивалы фæлгæтты нæ университеты фойейы байгом равдыст: «Гайто Газданов. Возвращение домой. 120 лет». Цытджын равдыстмæ æрбацыдысты университеты студенттæ æмæ ахуыргæнджытæ ректор Тедеты Вадимы сæргълæудæй. Ардæм ма фæуазæг Хуссар Ирыстоны Уæрæсейы Федерацийы æххæстбарджын минæвар Марат Кулахметов, уæрæсейаг фыссæг Юрий Нечипоренко, афтæ ма Александр Солженицыны номыл Уырыссаг фæсарæйнаг хæдзары минæвæрттæ Светлана Романова æмæ Константин Погорельский.

Равдысты фыццаг раныхас кодта Тедеты Залинæ. Уый банысан кодта фестивалы нысаниуæг, уымæй дарддæр ма бахахх кодта, студенттæ арфдæр кæй сахуыр кæндзысты Гæздæнты Гайтойы цард æмæ сфæлдыстад, уый.

Ректор Тедеты Вадим та йæ раныхасы арфæ ракодта Уырыссаг фæсарæйнаг хæдзары разамынадæн, цалдæр хатты университетæн чингуытæ кæй балæвар кодтой, уый фæдыл. «Хуссар Ирыстоны паддзахадон университет зæрдиагæй архайы, цæмæй уырыссаг æвзаг, литературæ æмæ истори популяризацигонд цæуа. Нæ университеты минæвæртты куысты руаджы дуне базыдта, Хуссар Ирыстон кæй у уырыссаг дунейы иу хай», – загъта университеты ректор.

Марат Кулахметов равдысты сæйраджыдæр æрдзырдта Гæздæнты Гайтойы стыр курдиат æмæ сфæлдыстады тыххæй. Уый  ма банысан кодта, зæгъгæ, йын хъæуы йе сфæлдыстадон бынтæ бавæрын. Абон æз мæхи нымайын амондджын, ахæм нысаниуæгджын мадзал кæй уадзæм, уый тыххæй. Нæ истори махæн у нæ сомбон. Тынг хорз хъуыддаг у, Гæздæнты Гайтойы уацмыстæ университеты программæмæ кæй бацæудзысты æмæ йæ студенттæ кæй ахуыр кæндзысты, уый. Ивгъуыд æнусы 30-æм азты куыд Набоковы, афтæ Гайтойы сфæлдыстадæн кодтой стыр аргъ. Гайто никуы уыд хъæздыг æмæ адæймаг хъæздыг куы нæ вæййы, уæд ын цардмæ дæр æндæрхуызон ахаст æмæ æндæр цæстæнгас вæййы», – банысан кодта Марат Кулахметов.

Мадзалы организатортæй сæ иу Светлана Романова та загъта, зæгъгæ, фестиваль ауадзыны хъуыддаг у сæ организацийы рухсадон проекттæй сæ иу, комкоммæ йын ис культурон-историон бынтæ бахъахъхъæныны нысан. «Уырыссаг æвзагыл Гæздæнты Гайтойы уацмыстæ чи кæса, уый бамбардзæнис, ирон кæй у», – банысан кодта Светлана Романова. Уый куыд фехъусын кодта, афтæмæй дыццæджы Дзауы скъола-интернатæн фестивалы фæлгæтты балæвар кæндзысты чингуытæ.

Цытджын раныхæсты фæстæ æппæт æрæмбырдуæвджытæ дарддæр базонгæ сты, Гæздæнты Гайтойы номыл чи байгом, уыцы равдысты æрмæгимæ. Равдысты скондмæ бацыдысты фотоæрмæджытæ, документтæ, газеттæ, журналтæ, классикы балцытæй арæзт бонæг æмæ йæ къамтæ, афтæ ма аудио æмæ видеоæрмæджытæ музейты архивтæй.

Равдысты фæстæ университеты конференцзалы дарддæр тымбыл фынджы уæлхъус университеты ахуыргæнджытæ æмæ уазджытæ Гæздæнты Гайтойы цард æмæ сфæлдыстады тыххæй æрдзырдтой бæстондæрæй. Студенттæ ам ногæй мацы базыдтаиккой, уый гæнæн нæ уыд.

https://xurzarin.ru/uyryssag-fyssaeg-jaexi-xuydta-iron-laeg/

Короткая ссылка на новость: http://xipu.ru/~529Uz

Возврат к списку