---

26.05.2023

Президент Гаглойты Алан йæхимæ райста Хетæгкаты Къостайы номыл Цæгатирыстойнаг паддзахадон университеты ректор Огъойты Аланы. Уый Хуссар Ирыстонмæ æрцыд кусæгон визиты.

Фембæлды ма хайад райста Тыбылты Алыксандры номыл Цæгатирыстойнаг паддзахадон университеты ректор Тедеты Вадим.

«Алан Уырызмæджы фырт, махæн тынг æхсызгон вæййы Хуссар Ирыстоны дæ уынд. Цæгат æмæ Хуссар Ирыстон æрмæст æфсымæрон республикæтæ не сты, фæлæ мах стæм иу адæм. Мах стыр аргъ кæнæм æмгуыстадмæ уæ æдзухон цæттæдзинадæн. Æмгуыстад æххуыс кæндзæн цыфæнды фарстатæ скъуыддзаг кæнынæн. Ныфс уын æвæрын, ме ‘рдыгæй æппæтварсон æххуысæй», – загъта Президент.

Огъойты Алан раарфæ кодта паддзахады сæргълæууæгæн хъарм химæрайсты тыххæй æмæ загъта: «Традицион æгъдауæй ныртæккæ не ‘мгуыстад цæуы ирон филологи, историон ахуырад æмæ журналистикæйы здæхтыты. Фæстаг рæстæджы нæ фæнды информацион технологитæ, физикæ, математикæ æмæ химико-биологон фадыджы ахастытæ рæзын кæнын. Фæндид мæ, цæмæй нæ уæлдæр ахуыргæнæндæтты коллективты ‘хсæн административон арæнтæ мауал уа, цæмæй нæ фæсивæд хайад иса УФ-йы Ахуырады министрады сæргълæудæй арæзт проектты, цæмæй не ‘взонг ахуыргæндтæ хайад исой ХИПУ-йы фæзуаты, цæмæй Хуссар Ирыстоны фæсивæд цæуа махмæ уникалон проектты хайад райсынмæ. Уыцы проекттæ мах реализации кæнæм Уæрæсейы зынгæ уæлдæр ахуыргæнæндæттимæ», – банысан кодта уый.

ХИПУ-йы ректор Тедеты Вадим банысан кодта, Алан Уырызмæджы фырты фæрцы уæлдæр ахуырæгæнæндæтты ‘хсæн ахастытæ кæй райстой гъæдджын ног æмвæзад.

«Абоны бон бирæ арæзт æрцыд: зонад-практикон конференциты иумæйаг хайад ист, иумæйаг мадзæлтты ауагъд. Мах уæлдæр ахуырæгæнæндæттыл æвæрд ис ирон æвзаг æмæ ирон культурæ популяризаци кæныны хæс. Мах хъуамæ бацархайæм, цæмæй, æгæрыстæмæй, фæлваргæ дæр мачи кæна нæ истори байсынмæ. Мæн тынг фæндид, цæмæй нæ историктæ, се ‘ппæт тыхтæ æртымбыл кæнгæйæ, интернет-хызæгты æмæ дзыллон-информацион фæрæзты нæ этносы егъау историйы тыххæй бирæ æрмæджытæ фæзына», – загъта уый.

https://xurzarin.ru/aemguystad-raezyn-kaenyn/

Короткая ссылка на новость: http://xipu.ru/~5vrm9

Возврат к списку