Тыбылты Алыксандыры номыл Хуссар Ирыстоны паддзахадон университеты журналистикӕ дæсныйады ӕмӕ ирон филологийы факультеты фыццаг курсы студенттӕ сӕ ахуыргӕнджытимӕ уыдысты практикон экскурсийы Чеселтгомы. Студенттӕ стыр цымыдисимӕ хъуыстой филологон зонæдты кандидат Дзабиты Зарбег сын цы историон факттыл дзырдта, уыдонмӕ, уӕлдайдӕр та Коцты Бегайы хабӕрттӕ, Чырыстон дин куыд фӕзынд ацы комы ӕмӕ иумӕйагӕй кувӕндӕтты тыххӕй. Студентты зӕрдӕмӕ тынг фӕцыд, Мады Майрӕмы кувӕндонмӕ цы бӕрзонд асиныл хызтысты, уыдон. (Ӕдӕппӕт 668 къӕпхӕны).
Экскурсийы ма студенттæн ирон адæмы цардæй цымыдисон цаутæ ракодтой ирон литературæйы кафедрæйы гæс Плиты Гацыр æмæ ирон литературæйы кафедрæйы хистæр ахуыргæнæг Плиты Серго.
Ацы комы рӕсугъд ӕрдз ӕмӕ сыгъдӕг уӕлдӕфӕн абарӕн ницӕимӕ ис, - дзырдтой студенттӕ.
Хъыгагӕн, сӕ фылдӕр фӕзивӕг кодтой ацы цымыдисон балцы ацӕуын.
Кӕд нырма студенттӕ сӕ кӕрӕдзи хорз нӕ зонынц, уӕддӕр, ирон ӕмбисонд куыд амоны: адӕймаджы базондзынӕ фынгыл ӕмӕ фӕндагыл, уымӕ гӕсгӕ ацы балцы уæвджытæ дӕр тынг бангом сты.
Кувӕндоны сӕхи бафӕдзӕхстой Хуыцау ӕмӕ Мады Майрӕмӕн, скуывтой ӕртӕ уӕливыхӕй ирон ӕгъдаумӕ гӕсгӕ.
Студенттæ райгондæй баззадысты ӕмӕ ныр ногӕй ӕнхъӕлмӕ кӕсынц радон балцмӕ.
Джиоты Джоконда,
журналистикӕйы факультеты 1-аг курсы студенткӕ