«Фыдыбæстæ, æвзаг, æгъдау æмæ фарн. Худинаджы бæсты - мæлæт!» Ю.С. Гаглойти

Тыбылты Алыксандры номыл Хуссар Ирыстоны паддзахадон университет
Юго-осетинский государственный университет им. А.А. Тибилова
South Ossetian State University named after A.A. Tibilov

10 Октября 2014

БÆРÆГБОНОН МАДЗАЛ КЪОСТАЙЫ ЦЫТÆН

БÆРÆГБОНОН МАДЗАЛ КЪОСТАЙЫ ЦЫТÆН Тыбылты Алыксандры номыл паддзахадон университеты (ХИПУ) уагъд æрцыд Хетæгкаты Къостайы номыл бæрæгбонон изæр. Мадзалмæ æрбацыдысты университеты ирон филологи æмæ журналистикæйы факультетты студенттæ, афтæ ма зонадон æмæ сфæлдыстадон интеллигенцийы минæвæрттæ. Мадзал байгом кодта æмæ йæ уагъта ирон литературæйы кафедрæйы гæс, профессор Плиты Гацыр. Уый æрдзырдта Къостайы нысаниуæгыл нæ адæмы царды. «Къоста уыд сæрибардзинадыл тохгæнæг. Йе сфæлдыстад кæддæриддæр агайдта æмæ агайы дзыллæты зæрдæты, æвдисы сæ йæ адæмы рис, сæ бæллицтæ». Ирон филологийы факультеты студенттæ мадзалмæ бацæттæ кодтой докладтæ ахæм темæтыл: «Хетæгкаты Къоста - мæгуыр адæмыл зарæггæнæг» (Зарина Кокойты, РАМП-ы 3-аг курсы студенткæ), «Къостайы номарæн æмдзæвгæтæ» (Мария Тъотъоты, РАМП-ы 3-аг курсы студенткæ) æмæ «Къоста æмæ фольклор» (Виктория Пухаты, тæлмац æмæ тæлмацгæнæн хайады 3-аг курсы студенткæ). Раныхасгæнджытæ кад кодтой Къостайæн, æппæт йе 'сфæлдыстадæн. «Сæйраг уый нæу, æмæ бирæ томтæ ныффыссай, сæйраг у чысыл æмæ гъæдджын уацмыстæ фыссын. Æмæ нæ ууыл та ахуыр кæны Къоста», - загъта мадзалы хайадисæг Харебаты Леонид. Уый ма мадзалмæ æрбацæуджыты раз бакаст йе ‘мдзæвгæ дæр Къостайы тыххæй. Банысан ма кодта, зæгъгæ, Къостайы тыххæй бирæ ис дзурæн, уый уыд адæмон поэт, райгуырд æмæ амард адæмы тыххæй. «Ахæм ирон лæг нæй, æмæ Къостайы чи нæ зоны. Уый у нæ сæрыстырдзинад. Йæ фæрцы мах рацыдыстæм размæ, рухсмæ». Мадзалмæ æрбацæуджытæ райгондæй баззадысты студентты бацæттæгонд докладтæй. 

Дриаты Лейла 
журналистикæйы факультеты фыццаг курсы студенткæ
Короткая ссылка на новость: http://xipu.ru/~BNY5S