«Фыдыбæстæ, æвзаг, æгъдау æмæ фарн. Худинаджы бæсты - мæлæт!» Ю.С. Гаглойти

Тыбылты Алыксандры номыл Хуссар Ирыстоны паддзахадон университет
Юго-осетинский государственный университет им. А.А. Тибилова
South Ossetian State University named after A.A. Tibilov

30.10.2022

Президентон стипендитæ — хуыздæртæн

Президент Гаглойты Алан президентон стипендитæ радта Паддзахадон университеты хуыздæр студенттæн.

Студенттæн паддзахады сæргълæууæджы цæст бауарзта стыр æнтыстытæ сæ ахуыры. Банысан кодта, уæлдæр ахуыргæнæндон диссаджы специалисттæ кæй уадзы, студенттæн дæр ахуыр кæнынмæ иттæг хорз ахаст кæй ис, уыдæттæ.

«Махæн тынг хорз фæсивæд ис, уыдон сты нæ буц фидæн æмæ нæ республикæйы дарддæры рæзт æмæ размæцыдæн стыр ныфс.

Нæ республикæ иумиаг у махæн æмæ йыл иумæ хъуамæ аудæм, хъуамæ йæ аразæм, кæмæн йæ бон куыд у, чи кæм рæхсы, афтæ, хъахъхъæнæм, уæззау фæндæгтыл цы хæдбардзинадмæ фæцыдыстæм, уый. Ныртæккæ нæ бæстæйы цы бирæ хæрзиуджытæ арæзт цæуы, уыдонæй сымах пайда кæндзыстут», — дзырдта Президент.

Бæстæйы разамонæг зæрдыл æрлæууын кодта, нæ университеты юбилейон мадзæлтты хайад кæй истой Уæрæсейы алы регионтæй бирæ уазджытæ. Уый, зæгъгæ, дзурæг у, уæлдæр ахуыргæнæндæттимæ уын биноныг ахастытæ кæй ис, ууыл.

Президент ма æхсызгонæй банысан кодта, университет кæй рæзы, ног факультеттæ дзы конд кæй цæуы, сæхи тыхтæй дзы арæзт кæй æрцыд музей æмæ музыкалон атмосферæйы кæй рæзынц æвзонг фæлтæр, кæй сын ис сæхи телеуынынад. Хицауады хæс дæр у, нæ иунæг уæлдæр ахуыргæнæдонмæ хъусдард лæмбынæг дарын. Мах та кæдфæндыдæр бахъуаджы рæстæджы уыдзыстæм уæ фарсмæ», — загъта Президент.

Гаглойты Алан ахсджиагыл банымадта, цæмæй нæ фæсивæд уæлдæр ахуырад райсыны фæстæ ифтонг цæуой куысты бынæттæй. Æмæ цы куыстыл æрлæууой, уым фæстæмæ ма кæсой, фæлæ размæ цæуой ныфсджын къахдзæфтæй.

Хуссар Ирыстоны Паддзахадон университеты ректор Тедеты Вадим æмæ профессорон-ахуыргæнджыты скондæн загъта бузныджы ныхæстæ, ахæм лæмбынæг ахаст кæй дарынц ахуырадон процессмæ, уый тыххæй. Банысан кодта, ныртæккæ уæлдæр ахуыргæнæндонæн иттæг хорз фадæттæ кæй ис хорз ахуырæн æмæ студентты аивадон æгъдауæй рæзын кæнынæн.

Ректор радзырдта, президентон стипендимæ раразмæгонд чи æрцыд, уыдон æрмæст хорз чи ахуыр кæны, æрмæст ахæм студенттæ не сты, фæлæ ма университет сæрыстыр кæмæй у, ахæмтæ сты.

Гаглойты Алан уæлдæр ахуыргæнæндоны иуæндæс студентæн радта президентон стипендитæ дидинджыты губакктæ æмæ зæрдиаг арфæтимæ.

Банысан кæнын хъæуы уый, æмæ ахæм мадзæлтты мах, информацион фæрæзты минæвæрттæ æдзух исæм хайад. Фæлæ ацы мадзалæн куыддæр æндæргъуызон ис рахæссæн кæсæджы рæгъмæ, ома, официалон информацийы хуызы нæйы. Бæстæйы разамонæг æвзонг фæлтæры минæвæрттимæ ныхас кодта зæрдæйæ зæрдæмæ, хи фæлмæн фыдау сын загъта, хъомыладон нысаниуæг кæмæн ис, ахæм фæндиæгтæ.

Президентон стипендитæ чи райста, уыдон сæхæдæг дæр бæстæйы къухдариуæгадæн, университеты ректор æмæ ахуыргæнджытæн загътой стыр бузныджы ныхæстæ, хорз ахаст сын кæй ис университетмæ, ахуыр кæнынæн ахæм хорз фадæттæ кæй ис, уый тыххæй.

Ирон филологийы студенттæ Сиукъаты Иринæ æмæ Тыбылты Аннæ фыццаг хатт райстой президентон стипендитæ. Уый, афтæ нысан кæны, æмæ уыдоныл ноджы фылдæр хæстæ æвæрд ис, цæмæй сæ тыхтæ æмæ сæ хъарутæ аздахой ахуырмæ, цæмæй нæ Ирыстонæн рæзт æмæ размæцыды хъуыддагмæ уыдон дæр сæ чысыл хайбавæрд хæссой.

https://new.xurzarin.ru/prezidenton-stipenditae-xuyzdaertaen/
Короткая ссылка на новость: http://xipu.ru/~A8R9J