---

19.10.2022

КАВКАЗ — КАСПИ – СКÆСÆН

Хуссар Ирыстоны паддзахадон университеты студенттæ хайад райстой æппæтдунеон форум «Кавказ-Каспий-Восток»-ы Стъараполы. Уый уагъд æрцыд Цæгат Кавказаг федералон университеты. Хуссар Ирыстоны делегаци уыдысты фондзæй: цыппар студенты: Джиоты Константин, Плиты Алисæ, Хуыгаты Миленæ, Зассеты Аланæ — «Уырыссаг æвзаг æмæ литературæ»-йы дæсныйадæй æмæ сæ къухдариуæггæнæг — ХИПУ-йы хистæр ахуыргæнæг Кокойты Лали Нодары чызг.

Форумы хайадисджытæн сæ фылдæр уыдысты Уæрæсейы, Абхазы æмæ Хуссар Ирыстоны университеттæй, фæлæ дзы Ази, Европæ, Африкæ æмæ Хуссар Америкæйæ дæр дзæвгар фæсивæд уыдис. Форум цыдис æртæ боны дæргъы. Æртæ боны, æвæццæгæн, фаг рæстæг у ног æмгæрттæ ссарынæн, райгуырæн бæстæйы хорз койтæ ракæнынæн, лекцитæй ног зонындзинæдтæ райсынæн, мидбæстон ахастытæ æрфидар кæнынæн. Уый охыл уагъд цæуынц ахæм фæсивæдон мадзæлттæ.

Форумы уыдис 5 командæйы. Организатортæ сæ адих кодтой дыууæ трекыл, уымæн æмæ вазыгджын темæтæ равзарын хъуыдис. Ноджы ма форум хъæздыг уыд лекцитæй, мастер-къластæй, суанг Пятигорскыл цымыдисон экскурси дæр фæсивæдæн сарæзтой организатортæ. Форумы программæйы æмæ йе’нкъарæнты тыххæй радзырдта фæндзæм курсы «Уырыссаг æвзаг æмæ литературæ»-йы дæсныйады студент Зассеты Аланæ:

«Никуы ферох уыдзæн мæнæй ацы форум. Æппæты тынгдæр мæ зæрдæмæ фæцыдысты лекцитæ мадзал аразыны фæдыл «Организация мероприятий» æмæ «Эффективные коммуникации». Лекциты ‘мрæнхъ мах зонгæ кодтам фæсарæйнаг студенттимæ, семæ ныхас кодтам. Уыдонимæ кæрæдзийæн дзырдтам нæ бæстæты тыххæй, нæ традицитæ æмæ æгъдæуттæ нæ сусæг кодтам. Семæ англисагау дæр аныхас кодтам, сахуыр кодтам араббаг ныхæстæ дæр. «Æз мæ ног хæлæрттæн бакастæн ирон поэтты æмдзæвгæтæ. Уыдон ма мæ фарстой Ирыстоны сгуыхт поэттæ æмæ фысджыты тыххæй. Ахæм хъарм æнкъарæнтæ райстон, ахæм хорз адæм ис Стъараполы, æмæ мæ мæ къах нал хаста уырдыгæй.»

https://new.xurzarin.ru/kavkaz-kaspi-skaesaen/

Короткая ссылка на новость: http://xipu.ru/~tBVuZ

Возврат к списку