---

13.10.2022

Фембæлд университеты

11-æм октябры Хуссар Ирыстоны паддзахадон университеты актон залы Президент Гаглойты Алан фембæлд университеты 90 азы юбилеймæ Уæрæсейы Федераци, Цæгат Кавказы æмæ нæм Абхазы республикæтæй чи æрцыдысты, уыцы делегациты минæвæрттимæ. Йæ раныхасы бæстæйы разамонæг  бузныг загъта уазджытæн, университеты юбилеймæ кæй саккаг кодтой æмæ нæм кæй æрцыдысты, уый тыххæй. Уый фæстæ банысан кодта, зæгъгæ, Кавказаг адæмтæ цæрæнбонты сты уазæгуарзаг æмæ уыцы традици абон мах цины æнкъарæнтимæ дарддæр кæнæм. Алчидæр уыл æмбæлы хорз æмæ арфæйы æнкъарæнтимæ.

Уый фæстæ уазджыты раз раныхас кодта Хуссар Ирыстоны фыццаг Президент æмæ университеты раздæры ректор, историк Цыбырты Людвиг. Уый университеты иуæй-иу фарстытыл æрдзурыны фæстæ банысан кодта, зæгъгæ, ирон æмбæстæгты цард æмæ Ирыстоны размæцыдæн нæ университет фæахъаз бирæ, нæ адæмæн хаста, хæссы æмæ хæсдзæнис хæрзиуæг.

Цытджын фембæлды Президент Гаглойты Алан Хæлардзинады орденæй схорзæхджын кодта Хуссар Уæрæсейы уæлдæр ахуыргæнæндæтты ректорты цæдисы сæргълæууæг, экономикон зонæдты доктор Марина Боровскаяйы.

«Хуссар Ирыстоны уæлдæр скъолайы кадджын кусæджы» номæй та Президент схорзæхджын кодта  Цæгат Кавказы Хæххон металургон институты ректоры хæстæ æххæстгæнæг, историон зонæдты кандидат, доцент Игорь Алексеевы.

Уазджытæй бирæтæ та хорзæхджын æрцыдысты «Ирон адæмы Фыдыбæстæйон хæсты фæуæлахизы дæс азы юбилейон майдан»-æй æмæ æндæр хорзæхтæй.

Дунеон æмæ Уæрæсейы Артийаг комитеты Вице-президент Ауес Бетуганов мадзалы йæ раныхасы фæстæ сыгъзæрин ордентæй схорзæхджын кодта Хуссар Ирыстоны Президент Гаглойты Алан æмæ паддзахадон университеты ректор Тедеты Вадимы.

https://new.xurzarin.ru/fembaeld-universitety/

Короткая ссылка на новость: http://xipu.ru/~ThHi8

Возврат к списку